O Bloque Nacionalista Galego reclama, máis unha vez, ao Goberno do Estado que atenda a “demanda unánime do conxunto da sociedade galega” e declare nula a concesión da Autoestrada do Atlántico e poña fin ás abusivas portaxes.
Unha “AP-9 pública, galega e libre de peaxes”, tal e como reza o lema do BNG, que “está máis preto de se materializar se o Goberno do Estado deixa de ser cómplice da empresa privada e renuncia a defender a legalidade da concesión diante do expediente aberto pola Comisión Europea sobre a nulidade da prórroga”. Así mesmo, e mentres non se logra ese obxectivo, o deputado Néstor Rego urxe a aplicar canto antes o incremento das bonificacións estabelecidas no Acordo de Investidura conseguido polo BNG, así como implantalas na AP-53.
Os galegos non debemos pagar por unha “autoestrada xa amortizada”
“Non é de recibo que os galegos e galegas continúen a pagar unha autoestrada xa amortizada, máis, cando a maioría das da súa xeración xa son libres de portaxes após 40 anos de concesión” denuncia o deputado do BNG no Congreso. Neste sentido, e ante a disposición da Comisión Europea de dialogar e negociar unha solución para evitar a xudicialización do caso, o BNG entende este momento como “unha oportunidade para que o Goberno do Estado e, no concreto, o Ministerio de Transportes procedan á rescisión do contrato coa actual concesionaria e pór fin a décadas de sobre-pagamento”.
Ademáis en vigoalminuto
- Kiko Rivera, cabeza de cartel do ‘Louro Valley 2024’
- Esgotadas, en menos dunha hora, as prazas para as rutas de Voando nas Rías Baixas e +Bosques
- Ofertas de Empleo en Vigo
Remate da concesión
A posición do deputado nacionalista ao respecto é clara e sinxela: “o BNG segue a reclamar, ao igual que o conxunto da sociedade galega, o remate da concesión para que esta sexa unha vía de xestión galega e pór fin ás abusivas peaxes desta infraestrutura”. O Goberno español, en opinión de Rego, debe reflexionar sobre as consecuencias de forzar o camiño da xudicialización deste proceso e o custo para as arcas do Estado. “O Goberno debe deixar de ser cómplice desta estafa legalizada dunha empresa privada que fai caixa a conta dos galegos e das galegas” subliña.
“Non pode, o Goberno, seguir a defender a legalidade dunha decisión que considera inxusta. Mesmo cando a propia Unión Europea insiste en que a resolución de prorrogar a concesión se adoptou para valorizar a autoestrada de cara a súa privatización e que non cabe aplicar a excepción in house que defende o Goberno español” evidencia.
Exemplo de Italia
Néstor Rego chama o executivo estatal a rectificar a súa postura e ter presente, por exemplo, o proceso xudicial que levou a anular en Italia a ampliación da concesión na autoestrada A-I2, Livorno-Civitavecchia, por non ter sacado a concurso as obras de prolongación da estrada que prorrogou a explotación da vía por parte dunha empresa durante 18 anos máis. “A sentenza do Tribunal de Xustiza Europeo foi clara neste caso: anulou a prórroga” subliña Rego.
Entre tanto, demanda Rego, o Ministerio de Transportes debe cumprir co Acordo de Investidura conseguido polo BNG e “aplicar cato antes o incremento das bonificacións xa estabelecidas para as persoas usuarias da AP-9, así como implantar as novas na AP-53”.
