O alcalde de Vigo, Abel Caballero, instou este xoves ao Conselleiro de Educación da Xunta de Galicia a financiar a ampliación “urxente e necesaria” dos comedores escolares de oito centros públicos vigueses.
Tras a reunión de onte entre a concelleira de Educación, Laura L. Atrio, e os responsables autonómicos do ramo na provincia, o alcalde asegurou que a Xunta ten a “competencia exclusiva” de atender esta necesidade que vese ampliada pola crise que está a ter impacto na cidade.
Abel Caballero, segundo informou, solicitoulle ao conselleiro de Educación unha reunión na que abordar “en días” a solución desta reforma, que estima en 940.000 euros. O alcalde manifestou a súa confianza en que o titular autonómico ofreza unha “resposta positiva” á demanda.
No caso de que a Xunta de Galicia non acometa a financiación das ampliacións dos comedores escolares, o alcalde xa adiantou que a Concellería de Facenda está a avanzar na reforma orzamentaria necesaria para acometer con medios municipais a reforma.
Xulgado do Mercantil
O alcalde vigués tamén solicitou da Consellería de Presidencia da Xunta de Galicia un apoio “categórico e contundente” á ubicación do Xulgado Mercantil na cidade de Vigo. O Consello Xeral do Poder Xudicial solicitou da Consellería un informe que garanta os medios materiais para a ubicación desta dotación xudicial en Vigo.
Abel Caballero recordou que o terceiro Xulgado do Mercantil constituíuse para a súa localización na cidade olívica, e conta co apoio do Goberno de España, do Ministro de Xustiza, das autoridades xudiciais galegas e da sociedade viguesa.
