O denuncian os nacionalistas de Mondariz Balneario a través dunha nota de prensa na que explican que os operarios contratados non contan coa roupa necesaria e cos mínimos medios de seguridade.
Dende o BNG lembran que “ao abeiro do Convenio de colaboración asinado en xullo de 2012 entre a Consellería de Traballo e Benestar e a Deputación de Pontevedra, destinado ao fomento do emprego mediante a contratación de traballadores para a realización de actividades ou proxectos de interese social nos concellos de menos de 50.000 habitantes da provincia, a Deputación contratou un total de 371 persoas, das que asignou un grupo ao concello de Mondariz Balneario”.
Neste senso, o Concello de Balneario “asumiu o compromiso proporcionar aos traballadores os medios materiais e a roupa de traballo necesaria para o desempeño das tarefas”, sendo o propio Concello o que debe decidir os traballos que lles encomenda.
“Cando xa levan catro meses exercendo o seu traballo, o concello inda non lle proporcionou nin o mais mínimo medio de protección, luvas, botas de seguridade, casco, fundas, ou roupa de auga” e os nacionalistas agregan que o caso “resulta moito mais escandaloso se temos en conta as condicións meteorolóxicas que se teñen presentado nestes últimos meses, “e que este persoal foi destinado á construción de muros de pedra, véndose obrigado a aproveitar as rochas e pedras presentes no propio lugar e que desenvolve a súas funcións á intemperie”.
Algún destes traballadores, cansado de solicitar a entrega da roupa de traballo sen ter resposta algunha por parte do concello, optou estes días por dar a coñecer á cidadanía a situación, colgando nas costas un letreiro no que expresa a súa reivindicación, sen que ate agora esta acción tivese resultado.
O BNG denuncia estas condicións de traballo que rozan o “escravismo” mais propias de séculos pasados que do século XXI no que vivimos, e por elo vai trasladar o caso entre outras instancias, ao Pleno da Corporación do Concello, ao da Deputación, e ao da Cámara Galega.
