A Unesco ven de declarar a zona de As Mariñas e Terras do Mandeo reserva mundial da biosfera, segundo informan os promotores desta candidatura, o Grupo de Desenvolvemento Rural ‘As Mariñas-Betanzos’.
A noticia deuse a coñecer na sede da Unesco no marco do Consello Internacional de Coordinación do programa MAB (Man and the Biosphere). Por unanimidade, o consello avalou a candidatura das Mariñas Coruñesas e Terras do Mandeo.
A Unesco destacou, para o seu ditame favorable, “o grande consenso social que alcanzou a candidatura resaltando o papel activo dos 18 concellos, a estruturación dos órganos de xestión que se crearán, e a programación xeral e económica xa prevista ata o ano 2022”.
Ata París, desprazouse unha delegación, encabezada polo presidente deste Grupo de Desenvolvemento Rural e alcalde de Abegondo, José Antonio Santiso, acompañado do vicepresidente e alcalde de Paderne, César Longo
Con esta distinción, Mariñas-Betanzos xa está incluída dende este martes, día 28, na rede mundial de reservas de biosfera, aínda que o título o recibirá nun acto que previsto para setembro ou outubro. A cualificación de reserva permitirá ao territorio, formado polos concellos de Abegondo, Aranga, Arteixo, Bergondo,Betanzos, Cambre, Carral, Cesuras, Coirós, Culleredo, Miño, Irixoa, Oleiros, Oza dos Ríos, Paderne, Sada, Curtis e Sobrado, optar a novas vías de financiamento específicas, así como potenciar o turismo e unha marca propia para produtos autóctonos.
