O voceiro nacional do BNG compareceu este luns acompañado do voceiro parlamentario, Francisco Jorquera, a raíz das declaracións do delegado do Goberno, Samuel Juárez, sobre a formación nacionalista, para avanzar que presentarán unha “reprobación” ao representante do Executivo en Galicia tanto no Congreso, coma no Parlamento de Galicia. Ademais, tamén estudan “medidas legais polas súas declaracións calumniosas e insidiosas”.
O delegado do Goberno, nunha entrevista a un diario galego dixo que lle gustaría “unha condena máis clara e máis inequívoca” do BNG a Resistencia Galega, e como xulgou que a actuación para paralizar o desafiuzamento da anciá Aurelia Rey en A Coruña, na que participou Jorquera, foi unha “acometida duns bárbaros”.
Para os dirixentes nacionalistas, estas declaracións “son irresponsables e improcedentes”, e “responden a unha estratexia do PP de criminalización da oposición”. Ademais, Xavier Vence entende que estas manifestacións son parte dunha “persecución” e das “medidas represivas” que está a adoptar o Goberno a través da Policía para “amedrentar á cidadanía para que non participe en protestas sociais”.
