A Consellería de Cultura, Educación e Ordenación Universitaria mobilizará preto de 20 millóns de euros ao longo dos vindeiros catro anos para recoñecer e impulsar a investigación universitaria máis excelente coa que conta Galicia.
Trátase dunha nova convocatoria “co maior montante xamais investido nunha convocatoria deste ámbito e dun xeito estable no tempo” que nace con dous obxectivos: recoñecer o importante esforzo realizado por determinadas unidades de investigación universitaria que funcionan como verdadeiros tractores da actividade científica do SUG e fortalecer os seus traballos de investigación, así como o impacto que xeran os seus resultados.
O prazo de presentación de solicitudes será dun mes a partir do 1 de setembro. Haberá unha modalidade dirixida aos centros singulares de investigación, que recibirán un financiamento de 14 millóns de euros ao longo dos próximos catro anos. En concreto, a primeira anualidade estará dotada dunha contía máxima de 400.000 euros por centro, mentres que a segunda, terceira e cuarta ascenderán a 800.000 euros.
Pola súa banda, a modalidade B refírese a agrupacións estratéxicas consolidadas, e cada unha delas poderá recibir unha contía máxima de 200.000 euros o primeiro ano e de 400.000 euros nos tres seguintes. En total, o investimento dedicado a este grupo ascende a 4,2 millóns de euros.
