O Hospital Álvaro Cunqueiro convértese, durante dous días, este venres, día 16, e o sábado, 17,no epicentro da formación en Cardioloxía en España, ao acoller o II Foro para residentes desta especialidade durante dúas xornadas.
Organizado pola Sociedad Española de Cardiología, cuxo presidente é o doutor Andrés Íñiguez, xefe do servizo de Cardioloxía do Complexo Hospitalario Universitario de Vigo (Chuvi), ao foro confirmaron a súa asistencia 60 MIR de toda España.
O curso céntrase nesta edición naquelas áreas que incorporan importantes novidades nos últimos anos, como a cardiopatía isquémica, a insuficiencia cardíaca (IC), e a diabetes e o alto risco cardiovascular.
O doutor Andrés Íñiguez, que dirixe o comité organizador, destaca que “pretendemos que, ademais de formarse, os futuros especialistas establezan redes de colaboración entre eles, así como cos seus hospitais”.
De feito, os asistentes ao Foro realizarán, como antesala ás sesións teóricas e prácticas, unha visita ás instalacións do Servizo de Cardioloxía do Álvaro Cunqueiro, para ver a tecnoloxía, os espazos, o funcionamento e os protocolos de actuación que se levan a cabo no hospital vigués.
A parte teórica das sesións do Foro está enfocada a que os residentes perfeccionen a forma de actuar ante problemas clínicos concretos e saiban tomar as decisións adecuadas en casos reais. Os propios residentes, supervisados por un cardiólogo, desenvolverán as intervencións que vanse expor no Foro.
