Convocados paros en Faurecia Asientos mércores, xoves e venres nas quendas de mañá, tarde e noite

As seccións sindicais da CIG e da CUT na compañía viguesa Faurecia-Asientos de Galicia veñen de convocar paros de 6 horas durante tres días ante os “incumprimentos en saúde laboral e o aumento da producción”. Ao mesmo tempo, desenvolverán concentracións diante da empresa coincidindo coas tres xornadas de folga, previstas para o mércores 10, xoves 11 e venres 12 de maio.

Segundo explican dende a representación sindical da CIG na compañía da automoción, os paros terán lugar de 11.00 a 14.00 horas na quenda de mañá, de 14.00 a 17.00 horas na de tarde e de 22.00 a 1.00 horas na de noite.

Hai que lembrar que a federación de Industria da CIG xa criticara a finais do ano pasado que o preacordo de convenio entre a dirección e os sindicatos CCOO, UGT e CGT fixase a negociación do plan de accións e planificacións da saúde laboral para despois da sinatura do convenio. A marxinación da saúde laboral, entre outras cuestións, levaron á central a rexeitar o pacto, de igual xeito que o fixeron a CUT e a CSIF.