A Deputación de Pontevedra reabre este martes, día 15, o Castelo de Soutomaior “cunha gran gala repleta de música e moitas sorpresas”, tal e como avanzou a presidenta do organismo provincial.
O evento, que terá lugar a partir 7 da tarde, servirá para presentar publicamente o “vangardista proxecto de musealización” que vén de rematar Deputación no Castelo.
Carmela Silva amosou este luns a súa satisfacción pola “altísima” demanda que está a rexistrar o castelo tralo anuncio da súa reapertura. “Onte pola tarde tivemos a primeira das xornadas de portas abertas e foi un éxito absoluto, rexistrándose preto dun millar de persoas, con ata grupos de homes, mulleres e moitos nenos e nenas procedentes de Portugal e Alemaña”.
As xornadas de portas abertas continuarán os días 20, 21, 22, 24 e 25 de maio, coa posibilidade de realizar un percorrido polo castelo a través de visitas libres e guiadas. Para participar nas visitas guiadas, que terán lugar ás 11 e 17 horas, a partir do 21, será preciso realizar unha inscrición previa a través do correo electrónico [email protected] xa que as prazas están limitadas a 22 persoas por grupo.
A Deputación de Pontevedra investiu na musealización do castelo 700.000€ “para dotalo de contido, de historia e rigor pero tamén de vangarda, modernidade e novas tecnoloxías, á altura de calquera castelo de Europa ou de todo o mundo”, asegurou a presidenta provincial. De feito, o castelo conta con materiais explicativos interactivos, incluíndo sete audiovisuais, recreacións en 3D, un videomapping e tres caixas máxicas.
