O goberno da Deputación de Pontevedra vén de rematar o proceso para a contratación de dúas persoas arquitectas para o concello de Tui que se incorporarán aos traballos en prol das persoas afectadas pola traxedia de Paramos. Como xa adiantara a súa presidenta, as dúas persoas arquitectas seleccionadas comezarán xa a traballar no concello tudense a partir do vindeiro luns.
“Tal e como se comprometeu Carmela Silva co concello e coas persoas afectadas, o goberno da Deputación iniciou a contratación directa a través do servizo público de emprego, ao que se presentaron once profesionais, e que resultou coa selección dunha arquitecta e dun arquitecto, ambos os dous con acreditada experiencia en plans urbanísticos”, indican dende a Deputación. Nos dous casos, as persoas contratadas reflicten nos seus currículo traballos de planeamento urbanístico e plans de desenvolvemento, así como proxectos de urbanización, execución e dirección de obra, asistencias técnicas, elaboración de instrumentos de ordenación territorial.
“Esta contratación é un paso máis dos moitos realizados polo goberno de Carmela Silva dende a explosión da pirotecnia en Paramos, Tui. Desde o primeiro momento a Deputación de Pontevedra puxo a disposición do concello a cinco asistentes sociais, dous xuristas, un arquitecto e un economista para asesorar e axudar ás persoas afectadas e ao propio Concello”.
A este feito, engaden dende a Deputación, súmase que tanto deputadas e deputadas como persoal directivo da institución provincial estiveron a disposición do goberno municipal, asistindo a reunións e propondo xestións ao Concello. Na actualidade, dous días á semana acoden ata Tui un asistente social e un aparellador, atendendo á demanda e necesidade formulada polo propio Concello de Tui.
