Os ingresos chegaron en 2018 a súa marca histórica: 43.606 pacientes
Os hospitais do Complexo Hospitalario Universitario de Vigo (CHUVI) acadaron o seu maior número de ingresos durante o pasado ano: 43.606. Deles 35.919 foron no Álvaro Cunqueiro e 8.287 no Meixoeiro. Esta cifra supuxo un incremento de 710 pacientes máis con respecto ao ano 2017.
Ao comparar os datos de hospitalización coa poboación que reside na área sanitaria de Vigo, pódese afirmar que aproximadamente un de cada 10 habitantes estivo hospitalizado nalgún dos centros do CHUVI durante 2018.
Pese ao incremento do número de ingresos rexistrouse un descenso na estancia media dos pacientes ingresados no hospital. Isto é: o número de días que cada paciente estivo hospitalizado, situouse nunha media de 7,31 xornadas, a cifra máis baixa dos últimos 7 anos.
Servizos
O maior número de ingresos produciuse nos cinco primeiros meses do ano, cunha media mensual de 3.800 hospitalizacións. Descendeu nos meses seguintes para repuntar a partir de outubro, manténdose no último trimestre entre 3.500 e 3.600 pacientes ingresados por mes.
O servizo hospitalario que máis ingresos rexistrou o pasado ano foi o de Medicina Interna, con 7.838 pacientes, un 18% do total. O segundo con máis hospitalizacións foi Obstetricia, con 4.768 (11% do total). E en terceiro lugar, Pediatría con 3.780, o que supón un 8,6% do total. Por encima dos 3.000 ingresos anuais situáronse tamén os servizos de Cirurxía Xeral e de Traumatoloxía.
Cardioloxía e Uroloxía excederon os 2.000 pacientes hospitalizados no último ano. E por encima dos 1.000 ingresos estiveron os servizos de Dixestivo, Pneumoloxía, Neuroloxía, Otorrinolaringoloxía e Xinecoloxía.
Estas cifras supoñen que 12 servizos hospitalarios do CHUVI estiveron por encima do milleiro de pacientes ingresados o ano pasado.
Coidados Críticos
As tres Unidades de Coidados Intensivos -Pediátrica, Neonatal e de Adultos- tamén experimentaron un importante número de ingresos, alcanzado a cifra de 2.526 pacientes.
A UCI Pediátrica consolídase como a que máis pacientes tivo, 1.036. O pasado ano foi o segundo no que se rexistraron máis ingresos graves pediátricos que de adultos. De feito, en 2018 entraron na UCI de Adultos 988 persoas.
En canto á UCI Neonatal mantivo o aumento sostido do número de pacientes ingresados que se experimentou desde a apertura do Hospital Álvaro Cunqueiro, con 502 ingresos de bebés.
