O mundo da astronomía será o protagonista das fins de semana deste verán. VigoZoo celebra os seus primeiros 50 anos de vida con diferentes actividades para achegar á cidade a esta área de coñecemento.
‘Sábados astronómicos’
Os “Sábados astronómicos” desenvólvense o sábado 26 de xuño, todos os sábados do mes de xullo e todos os de agosto, excepto o último. As persoas participantes, en grupos de 25, poderán aprender con actividades de astronomía e observación de estrelas entre as 22:00 horas da noite e ata as 00:00 horas da madrugada.
Tamén poderán coñecer a filosofía Startlight; a traxectoria dos astros; nocións de uso do telescopio e os prismáticos para observación dalgunha galaxia; localización con punteiro láser das constelacións e recibir nocións de mitoloxía.
‘Noite das Perseidas’
“Noite das Perseidas”: celébrase o 12 agosto dende as 22:00 horas e ata a medianoite. A previsión do goberno municipal é que poidan asistir 75 persoas, en función das restricións Covid vixentes. A cita será para observar as Perseidas e aprender a localizar as constelacións, con xogos astronómicos para os máis pequenos.
‘Astronomía en VigoZoo’
A terceira proposta, pensada para as familias, é “Astronomía en VigoZoo” e terá lugar os domingos: o 27 xuño, todos os de xullo e os tres primeiros de agosto, en horario de mañá e tarde (con catro sesións ás 11 e 13 horas e ás 16 e 18 horas da tarde), en grupos de 10-12 persoas.
Serán actividades baseadas na simulación mediante a proxección do ceo nocturno de Vigo, cun programa informático e pantallas e proxectores da sala de cambio climático de Vigozoo. As persoas que asistan aprenderán a orientarse durante a noite; recoñecer as constelacións, estrelas e planetas visibles esa noite; recibirán nocións de mitoloxía e historia da astronomía así como o manexo dun planisferio.
Para sumarse ao programa de VigoZoo é preciso facer reserva previa, no teléfono 986267783. As actividades desenvolveranse cumprindo as medidas de seguridade sanitaria vixentes en cada momento.
