Marea de Vigo cré que é necesario ampliar o servizo de Socorrismo nos areais da cidade. A concelleira Oriana Méndez lémbralle ao alcalde que os socorristas deben de estar nas praias, do 1 de xuño ao 30 de setembro, como di a ordenanza municipal. “Polo tanto – indica – , hai unha contradición entre o contrato coa concesionaria e a ordenanza vixente”.
Máis horas
Alén disto, Marea de Vigo tamén reclama unha ampliación de horarios, “non ten sentido que haxa praias onde o servizo só funcione de catro a oito da tarde”. Oriana Méndez indícalle a Caballero que “debe atender as demandas do persoal”. As mesmas foron trasladadas a través de varios escritos remitidos ao Goberno local por medio do rexistro do Concello. Entre elas están as ampliacións de horarios e datas.
