O Bloque Nacionalista Galego pide que o Goberno municipal actúe ante o abandono da Praza da Independencia. Dende o BNG recóllense as denuncias e queixas da veciñanza da zona, que alertan sobre a «falla de mantemento e de limpeza polo desleixo do goberno de Abel Caballero».
Empedrado, zonas axardinadas, limpeza e coches aparcados en espazo peonil
«Son evidentes os desperfectos, con empedrado levantado, zonas axardinadas abandonadas, falta de limpeza e a crecente presenza de vehículos estacionados neste grande espazo peonil», explica o concelleiro Xabier P. Igrexas. Entre os estragos, a veciñanza destaca o estado de deterioro que presenta o monumento aos heroes da Reconquista, situado no corazón da praza.
Abandono
«Unha praza que foi emblema no seu momento dese ambicioso e audaz proxecto de humanización real da cidade e de democratización do espazo público, impulsado polo BNG, e que supuxo a súa peonalización como tamén no caso do Calvario», apunta Igrexas, que lamentou que estes e outros espazos importantes para a veciñanza de Vigo continúen padecendo a falla de xestión do Goberno local.
Non todo son «primeiras pedras e grandes inauguracións»
«A política non se pode reducir a primeiras pedras e grandes inauguracións», criticou o edil do Bloque. «Non podemos seguir asistindo a como se degradan diferentes ámbitos da cidade porque alí non se quere poñer o foco propagandístico«, remachou.
