A Eurocidade Tui-Valença podería ser a primeira eurocidade europea unida por un vehículo autónomo e sostible. Os mandatarios da Eurocidade, Enrique Cabaleiro, alcalde de Tui, e José Carpinteira, presidente da Cámara de Valença, amosaron o seu interese neste novo medio de transporte tras probar o prototipo deseñado polo Centro Tecnolóxico de Automoción de Galicia (CTAG) e que está a realizar probas na vella Ponte Internacional, a rúa común que comparten ambos municipios.
O alcalde de Tui, Enrique Cabaleiro, destacaba a importancia de que “o CTAG elixise este espazo para realizar esta proba”, e engadia que “foi un día importante para este territorio transfronteirizo polo que supón de innovación tecnolóxica en materia de mobilidade”.
Mellora da mobilidade entre Valença e Tui
Salientaba así o rexedor tudense que “vemos neste proxecto unha oportunidade sobre todo en aras de mellorar a mobilidade das persoas entre os núcleos históricos de Valença e de Tui, nun vehículo autónomo e totalmente respectuoso co medio”.
Os alcaldes solicitaron onte ao CTAG, que amosou total colaboración, estender este proxecto piloto máis aló da ponte internacional até os conxuntos históricos das dúas cidades, para poder despois candidatar este proxecto á próxima convocatoria dos fondos POCTEP, programa Interreg VA España-Portugal.
Meses de probas
O CTAG, Centro Tecnolóxico da Automoción de Galicia, leva meses probando este novo vehículo na vella Ponte Internacional de Tui. Este Shuttle forma parte dun proxecto europeo no que proban coma a tecnoloxía 5G poden axudar a mellorar a condución autónoma en entornos complexos coma os urbanos e transfronteirizos.
Este vehículo eléctrico, aínda que é totalmente autónomo, deberá levar un supervisor xa que así o establece a actual lexislación nesta materia.
Presentación para Europa na vella Ponte Internacional
Concluídas as probas nuns meses a presentación deste proxecto para toda Europa será na vella ponte internacional o que suporá un escaparate moi importante para a Eurocidade.
Esta nova iniciativa camiña na liña dun dos dez obxectivos marcados na Axenda Urbana, en concreto no obxectivo 5 enfocado a favorecer a proximidade e a mobilidade sostible. O Concello de Tui é un dos 121 concellos de España que conseguiu fondos europeos para a redacción da súa estratexia de crecemento sostible.
