Baixa a idade mínima aos 45 anos e sube a máxima aos 74
O presidente da Xunta anunciou este mércores que Galicia ampliará un 50% o número de cribados de cancro de
mama, o que suporá que se beneficien deste programa 200.000 mulleres máis das que o estaban a facer na actualidade.
Para iso, vaise rebaixar a idade mínima destas probas diagnósticas, que pasará dos 50 aos 45 e ampliarase na idade máxima, que subirá dos 69 aos 74.
“É unha necesidade para moitas mulleres”
Argumentou Alfonso Rueda con respecto a esta medida, da que deu conta nas respostas do pleno do Parlamento galego, onde lembrou que o programa de prevención do cancro de mama foi pioneiro en Galicia e, posteriormente, estendeuse a outras comunidades.
Para avalar esta política sanitaria o presidente salientou o calendario de vacinas administradas polo Servizo Galego de Saúde, “que noutras comunidades nin se plantexan e teñen que seguir pagándoas as familias”, comparou. Na mesma liña, resaltou que este mesmo ano todas as áreas sanitarias galegas van contar co programa de detección do cancro de cérvix.
