Carmela Silva e Suan Steele reuníronse en Vigo
Dúas institucións presididas por primeira vez por dúas mulleres, Carmela Silva á fronte da Deputación de Pontevedra e Susan Steele na Axencia Europea de Control da Pesca, radicada en Vigo, afianzan a súa relación coa apertura de vías de colaboración e traballo que se traducirán en novas iniciativas.
As dúas responsables mantiveron un cordial encontro na sede provincial viguesa, no que xa se avanzou a posta en marcha dun novo proxecto medioambiental para frear a pegada de carbono e a utilización de espazos no edificio da rúa Chao para actividades da Axencia.
Plantación de árbores
Na xuntanza entre a presidenta da Deputación e a directora executiva da EFCA, a sostibilidade e o medio ambiente foi un dos puntos centrais do encontro, xa que ambas institucións porán en marcha, en consonancia coas directrices europeas, un “ambicioso proxecto para diminuír a pegada de carbono”, mediante a plantación de árbores en concellos da provincia.
Trátase dun programa que se implementará para compensar cada viaxe que se faga por parte da Axencia Europea de Pesca coa plantación de especies en espazos públicos da provincia e no que tamén Areeiro intervirá no asesoramento.
“Ambas administracións estamos plenamente comprometidas co medio ambiente –dixo a presidenta provincial– cun relato que tamén comprometa a sociedade, polo que é necesario establecer vínculos e adoptar acordos que sigan a amosar o noso respectivo obxectivo medioambiental”.
Susan Steele referiuse tamén a este concepto, que definiu como “global” e amosou a plena disposición da Axencia a colaborar nesta iniciativa “de xeito moi especial”, en consonancia con iniciativas europeas que se están a desenvolver.
A sede da Deputación a ‘disposición’ da Axencia de Pesca
Por outra banda, Carmela Silva mostrou tamén a súa “total disposición” a que a Axencia Europea de Pesca poida utilizar algún dos espazos da sede viguesa da Deputación a fin de desenvolver algunha das súas moitas actividades. De feito, recordou Carmela Silva, esta sede non só está funcionando en Vigo como mera sede administrativa, “senón que desde que naceu, a idea era que puidésemos ceder espazos á cidade e hoxe hai colectivos que usan estas instalacións”.
Punto de información europea
Nese ámbito, a Deputación e a Axencia avanzaron tamén na posibilidade de que a sede provincial de Vigo poida acoller nun futuro un punto de información europea para toda a provincia. Trataríase dun centro informativo, avalado pola Unión Europea, para amosar á cidadanía todas as cuestións relativas ao funcionamento de programas europeos.
A convocatoria para poñer en marcha estes espazos, desde deputacións ou concellos, está prevista para o 2025, e ambas indicaron o seu interese en poder concorrer.
Por último, na reunión, a presidenta tamén quixo poñer en valor o feito de que sexa unha muller a responsable dun organismo europeo de tanta relevancia como é a Axencia de Pesca. “É moi importante visibilizar a mulleres como Susan Steele –sinalou– porque as mozas necesitan referentes e que unha muller dirixa esta axencia ten moita importancia. Necesitamos que as nenas e mozas saiban e vexan que as mulleres xa estamos nos grandes postos de decisión en todos os eidos”.
