Coincidindo co paro no sector do Metal, que terá lugar este martes día 20, as centrais sindicais convocan unha manifestación que rematará diante do IFEVI, onde se celebra o Mindtech (unha feira internacional da industria e das tecnoloxías metalúrxicas) que organiza a patronal Asime.
A xornada reivindicativa iniciarase a primeira hora da mañá diante das empresas, para posteriormente desprazarse até os dous puntos dende os que ás 09:30 horas arrincarán as columnas que confluirán no IFEVI: a empresa Panelfa (avenida de Peinador, 74); pavillón Loureiro (camiño do Amaro, 71), nos arredores do recinto feiral. Na manifestación participarán ademais traballadores chegados tanto de Pontevedra como das comarca do Salnés e do Deza.
Sen acordo
A folga segue adiante, unha vez rematou sen acordo a xuntanza celebrada hoxe por iniciativa das patronais tras o éxito da primeira xornada de folga celebrada o pasado xoves día 15. A mesma supuxo a paralización do sector, con especial incidencia no naval.
O encontro de hoxe prolongouse dende as 09:00 até as 15:00 horas e pechouse sen acordo. Segundo os sindicatos, foi pola “negativa do empresariado a manter a cláusula de revisión salarial conforme ao IPC real; reducir a xornada anual en máis de oito horas e garantir a subrogación do persoal entre empresas privadas”.
Deste xeito, o secretario comarcal da CIG-Industria de Vigo, Xulio Fernández, incide en que estas tres cuestións “son esenciais” á hora de asinar un acordo que permita desbloquear o conflito. Neste senso, lembra que no caso de que a patronal “non reconsidere a súa posición e achegue unhas propostas que permitan dignificar as condicións laborais das persoas traballadoras do sector” desenvolveranse dúas novas xornadas de folga: este mesmo xoves 22 e para o vindeiro mércores 28.
