O presidente da Deputación recibiu este martes un grupo de dez menores da cidade Ucraína de Bucha, unha das zonas máis castigadas pola guerra, que pasarán o mes de agosto nun campamento nas instalacións da Cidade Infantil Príncipe Felipe de Pontevedra.
Luis López, que lles fixo entrega de agasallos, deulles a benvida desexándolles unha proveitosa estancia e amosando o seu desexo de que poidan coñecer os atractivos da provincia de Pontevedra.
Este grupo de menores ucraínos, de entre 9 e 14 anos, vén acompañado dun adulto experto en traballo social. Todos eles proveñen de Bucha, na rexión de Kiev e forman parte de familias numerosas, de combatentes, de militares e de falecidos en combate. As cativas e cativos permanecerán entre nós ata o 28 de agosto e estarán a residir nun espazo preparado para que teñan todas as comodidades dun fogar convencional.
Atención
Así, durante estes días, a Deputación de Pontevedra ofrécelles servizo de manutención; médico; atención psicolóxica; tradución; posta a punto de roupa; acceso á piscina do centro e unha ampla planificación de actividades nas que se potenciarán valores como a convivencia; benestar; coidado do medio ambiente e o coñecemento lingüístico.
Lecer
Tamén están programadas excursións para que coñezan recunchos da provincia de Pontevedra como A Illa de Arousa; Cabo Home; Cangas e praias como A Lanzada e Lapamán, así como outros lugares de Galicia como Santiago de Compostela, Cerdeda, a Costa da Morte e Gandarío.
O campamento de menores de Ucraína en Príncipe Felipe é unha iniciativa organizada polo Comité Europeo das Rexións e pola Asociación de Cidades de Ucraína, encabezada polo alcalde de Kiev, Vitali Klichkó, para apoiar as nenas e nenos que están a sufrir as consecuencias da guerra. O pasado xullo as instalacións da Deputación de Pontevedra
acolleron outro grupo de dez menores procedentes de Pervomaiske, cidade moi próxima á zona de conflito.
