Por medio dunha resolución da Alcaldía, o Concello de Ponteareas vén de aprobar as bases reguladoras das subvencións incluídas no Programa de Axuda ás actuacións de rehabilitación a nivel de Barrio do Plan de Recuperación, Transformación e Resiliencia que poden chegar ata 30.000 euros.
Axudas aos veciños para obras nas súas vivendas
O obxecto das axudas é a achega de financiación aos veciños e veciñas que leven a cabo obras de mellora da eficiencia enerxética nas súas vivendas, especialmente na envolvente dos edificios residenciais ou vivendas unifamiliares localizadas no ámbito da contorna Residencial de Rehabilitación Programada do Concello de Ponteareas ou ERRP Zona Vella de Ponteareas.
Trámites
Poderán beneficiarse destas axudas todas aquelas persoas físicas e xurídicas que non desenvolvan actividades económicas e concederanse seguindo a orde de presentación da documentación completa, segundo as zonas de actuación prioritarias, comezando pola Fase 1 ata a Fase 3; ata esgotar o crédito dispoñible e tendo seis meses para a presentación da documentación como período máximo para cada fase.
Para dar solventar as dúbidas que poidan xurdir entre os veciños e veciñas que poden acollerse a estas axudas, o Concello ten previsto levar a cabo unha xornada informativa antes do Nadal, que se dará a coñecer oportunamente, para chegar ao maior número de persoas posible.
Recuperación do núcleo antigo
Un dos obxectivos do Concello é a recuperación do núcleo antigo da vila, coa recuperación da contorna e a súa posta en valor, e fomentando a fixación da poboación nesta área. Esta meta terá apoio nestas axudas, así coma en outras actuacións que xa se están a levar a cabo.
Toda a información relativa a este programa de rehabilitación estará dispoñible para a súa consulta no Taboleiro de Anuncios do Concello de Ponteareas, e tamén na páxina web municipal. Este programa está financiado pola Unión Europea a través dos Fondos Next Generation e xa está publicado no Boletín Oficial da Provincia de Pontevedra, polo que dá comezo o período de exposición pública á cidadanía.
