O Concello do Porriño, a través da concellería de Xuventude, que dirixe Antonio Barros, fai un chamamento para as familias, as persoas maiores de 18 anos ou menores acompañados que estean interesadas en botar unha man, participen como voluntarios na plantación de árbores, actividade de restauración ambiental que ten como obxectivo a recuperación do ecosistema fluvial do río Couso, no seu treito final antes de chegar ao río Louro.
Este río, afluente do Louro, que pasa por Cans e Atios, alberga unha elevada biodiversidade que nos últimos anos sufriu a expansión de varias especies exóticas invasoras (EEI) que provocaron o desprazamento de especies autóctonas, alterando significativamente o ecosistema.
Verdegaia
Para a súa restauración ambiental, o Concello do Porriño colabora coa asociación ecoloxista Verdegaia. “As intervencións que se levarán a cabo, estarán supervisadas por membros desta asociación que contan cunha ampla experiencia en actividades de restauración ambiental e de eliminación de especies invasoras”, explicou o concelleiro, “No final de 2023 realizamos varias actividades nese treito centradas na recollida de lixo no leito e nas marxes do río e na eliminación dalgunhas especies invasoras. Dado o éxito da actividade entre os participantes, pretendemos continuar este ano coa recuperación deste espazo natural”.
Sábado, día 10
Así, o sábado 10 de febreiro en horario de 11:00 h a 13:00h, no punto de encontro: rúa Leandro Diz, 5 (ao lado do paso inferior), continuarase coa plantación dalgunhas árbores na marxe do río Couso co obxectivo de recuperar o ecosistema e fixar o solo de modo que se minimice a erosión. En concreto plantaranse ramas de salgueiro e vimieiro, que enraízan facilmente e son moi acaídas como árbores de ribeira. As prazas están limitadas a 20 voluntarios/as por xornada.
Dende a OMIX agradecen a colaboración e solidariedade da veciñanza do Porriño. Aquelas persoas interesadas en formar parte do equipo de voluntariado para esta actividade, poderán informarse e/ou inscribirse no teléfono 986337624 (ext. 1) ou nos correos electrónicos [email protected] , [email protected] , ata o día 9 de febreiro de 2024.
