O Concello do Porriño presentou hoxe a súa programación conmemorativa do 8M, Día Internacional da Muller, con actividades de visibilización sobre o papel das mulleres en diversos ámbitos e a relevancia de seguir reivindicando unha igualdade real e efectiva.
“Este 8M temos que seguir loitando pola igualdade real entre homes e mulleres, hai que avanzar na visibilidade e concienciación e protexer ás mulleres desde todos os ámbitos de responsabilidade”, apuntou a concelleira de Igualdade. “Este Concello e o Goberno Local están moi concienciados coa igualdade, co impulso de políticas para que a sociedade avance en igualdade e inclusión”, salientou Carolina González.
Actividades
Son varias as iniciativas incluídas nesta programación coas que se pretende chegar a toda á sociedade. Comezando pola instalación do renovado Punto Violeta, que estará durante toda a xornada do 8M na Praza Arquitecto Antonio Palacios, con persoal cualificado que ofrecerá información en materia de igualdade, e tamén a colocación das bandeiras conmemorativas que xa penduran da fachada da casa consistorial.
A educación é outro pilar clave na loita contra a desigualdade. Por iso están incluídas actividades específicas para as/os máis pequenas/os, como o espectáculo musical “A igualdade non ten idade”, dinamizado con xogos e dinámicas para amosar unha sociedade na que conflúen persoas diferentes na súa esencia pero iguais en dereitos e oportunidades. Será na praza do Concello ás 18:00 h. De seguido, ás 19:30 h, a actuación musical de LAW.
Outro dos actos importantes deste programa é a colocación de varias placas nas rúas e prazas do Concello co nome de mulleres que polas súas ideas e accións convertíronse en referente para moitas outras, deixando a súa pegada na nosa sociedade. Todas elas, están incluídas no rueiro municipal, pero dende o executivo avanzan que serán máis as rúas que levarán nome de muller.
‘Mulleres con eco’
No marco da campaña “Mulleres con eco”, colocaranse no centro urbano varios contenedores co rostro de importantes mulleres galegas que tiveron que facerse oco nun mundo predominado polos homes, simbolizando a importancia do seu traballo e do de moitas mulleres máis na construccón dunha sociedade igualitaria.
Para rematar, impulsáronse unhas xornadas de defensa persoal para mulleres: unha dirixida ao alumnado de 1º de bacharelato –que contará coa presenza da xuíza do Xulgado de 1ª Instancia e Instrucción nº3 do Porriño- e outra aberta a todas as mulleres que queiran participar. Estas últimas impartiranse no pavillón municipal e teñen como obxectivo que as participantes desarrollen máis confianza nelas mesmas e no seu entorno, aprendan estratexias de prevención e detección de situación de perigo e inegren na súa vida diaria hábitos de seguridade persoal.
A xornada do 8M rematará coa lectura da declaración institucional e a proxección do vídeo conmemorativo.
5º Plan de Igualdade do Porriño
A concelleira adiantou durante a presentación, que neste momento o Goberno municipal traballa “no 5º Plan de Igualdade do Concello do Porriño, un plan viable e alcanzable coa perspectiva de xénero en todas e cada unha das áreas”.
Pola súa banda, o alcalde concluíu reivindicando “a necesidade traballar a prol da igualdade os 365 días do ano”. Para iso, salientou Alejandro Lorenzo, “é preciso que as administracións nos involucremos e sexamos quen de involucrar tamén a todos os axentes sociais. A defensa dos dereitos das mulleres é cousa de todas e todos”.
