O subdelegado do Goberno en Pontevedra anunciou hoxe que o Executivo destinará 3,67 millóns de fondos europeos para a renovación da estación de Redondela. Fíxoo no marco dunha visita á terminal ferroviaria.
Reforma integral
Para facela posible, o Administrador de Infraestruturas Ferroviarias (ADIF) vén de sacar a licitación este contrato que prevé a creación de dúas novas marquesiñas, na plataforma 2 e na embocadura do paso inferior da plataforma 1; a instalación, nas plataformas, de novos puntos de luz; cambio de pavimentos, equipamentos e sinalética. Así mesmo, equiparase o novo paso inferior de ascensores con iluminación e vixilancia.
Polo que ten que ver co edificio de viaxeiros, proxéctase a renovación do vestíbulo, aseos e teitos. Tamén a iluminación exterior e da fachada de acceso ás plataformas. Así mesmo, acometerase a substitución das luminarias actuais por LED e un tratamento integral de paredes, chans e carpinterías.
Paso da praza ás plataformas e novos aseos
Nesta liña, Abel Losada explicou que o proxecto prevé a reorganización deste espazo mediante a creación dun paso directo entre a praza da estación e as plataformas. Ademais, nas actuais oficinas de venta de billetes, sen uso, crearanse novos aseos, accesibles.
Losada, que non facilitou a data de inicio dos traballos nin da súa finalización, informou de que se contempla tamén unha reordenación da praza da estación. Para iso está prevista unha nova zona de aparcamento, unha bolsa de taxis e a delimitación do paso de peóns. Amais, reservarase unha praza de aparcamento para persoas con mobilidade reducida e outra disporá dun punto de carga eléctrico. Por último, planease tamén substituír os pavimentos; rehabilitar o sistema de saneamento, que actualmente atópase en mal estado, e renovar tanto a iluminación como a rotulación exterior.
Redondela-Vigo
Este proxecto é unha actuación posterior e complementaria ás obras de renovación integral do tramo entre Redondela e Vigo-Guixar e as súas estacións, nas que o Goberno de España investirá un total de 14,1 millóns de euros.
