A portavoz nacional do BNG, Ana Pontón, denunciou hoxe en Vigo o incremento do transvasamento de recursos públicos á sanidade privada “por parte dun Executivo do PP que, mentres tanto, continúa cos seus recortes e privatizacións na sanidade pública”, na que acumula xa un recortazo de 2.000 millóns de euros só na Atención Primaria dende que chegou ao goberno en 2009.
Informe do Consello de Contas
Neste sentido, a xefa da oposición fixo referencia ao último informe do Consello de Contas que confirma a deriva privatizadora do Goberno de Alfonso Rueda, cun incremento do 18% dos concertos coa sanidade privada dende 2019.
“Estamos falando, se temos en conta os concertos económicos e o que pagamos polas obras do hospital Álvaro Cunqueiro, de 320 millóns de euros que se van á sanidade privada en vez de utilizarse para garantir a mellor atención na sanidade pública”, afondou logo da reunión que mantivo coa xunta de persoal do Álvaro Cunqueiro para abordar a situación do sistema sanitario público na área de Vigo, encontro no que tamén participaron a portavoz parlamentaria de Sanidade, Montserrat Prado, e o portavoz municipal, Xabier Pérez Igrexas.
Pontón advertiu que destes 320 millóns, 200 corresponden á área sanitaria de Vigo, o que demostra “até que punto o Partido Popular fixo desta área un banco de probas da privatización, sen importarlle as consecuencias que isto ten á hora de mellorar a calidade de vida das persoas”.
“Favorecer o negocio coa saúde das persoas”
A portavoz do BNG advertiu que, lonxe de traballar para mellorar a atención nesta área sanitaria, o Executivo do PP leva anos traballando “para favorecer o negocio coa saúde das persoas”, do que é boa mostra o hospital Álvaro Cunqueiro, polo que, recalcou, os galegos e as galegas pagaron “un sobrecusto de 470 millóns de euros, a pesar dos recortes no proxecto orixinal”, que supuxeron 700 camas menos, menos quirófanos, menos servizos e mesmo unha superficie inferior ao previsto inicialmente.
“Un auténtico escándalo”, sintetizou a líder nacionalista, quen recordou que este sobrecusto, denunciado no seu día tamén polo Consello de Contas, foi recentemente elevado a máis de 1.000 millóns por un informe da propia Universidade de Vigo.
“O Partido Popular, en vez de destruír a sanidade pública, ten que traballar para construíla”, reclamou, para indicar que a reconstrución do servizo sanitario público en Vigo debe comezar polo rescate do Álvaro Cunqueiro, polo que se vai a pagar 70 millóns anuais nunha concesión até o ano 2035.
Atención Primaria
Así mesmo, avogou por desenvolver medidas concretas que permitan solucionar os problemas dos centros de Atención Primaria dunha cidade na que a poboación se está a mobilizar de xeito continuado para obter respostas dun Goberno do PP que, pola contra, continúa cun “programa moi claro” para deteriorar a sanidade pública en beneficio da privada, tal e como demostran as cifras.
Listas de espera maquilladas e falla de pediatras
Listas de espera de até 15 días para poder acudir ao médico ou médica de cabeceira, 11.000 nenos e nenas sen pediatra asignado e listas de agarda que tampouco deixan de medrar nos hospitais, enumerou. Neste sentido, referiuse ás listas de espera oficiais coñecidas recentemente e que, pese a estar “maquilladas”, elevan a 350.000 as persoas que están agardando para ser atendidas na sanidade pública.
“Cada vez os temos de espera son maiores e detrás de cada espera por unha cirurxía, por unha proba diagnóstica ou por unha primeira consulta en especialista hai unha persoa, porque non estamos falando de números, estamos falando de persoas que sofren as consecuencias de que se retrasen os seus diagnósticos”, afondou Pontón, quen mostrou a súa preocupación polas políticas dun PP que “está convertido nun perigo para a saúde dos galegos e das galegas” a costa de “seguir alimentando o negocio da sanidade privada”.
Por iso, pediu ao Executivo de Rueda que cese a súa “política de acoso e derribo” contra o sistema sanitario público e desenvolva medidas como as propostas polo BNG e que pasan pola posta en marcha dun plan para reforzar a Atención Primaria, á que se referiu como “o corazón do sistema sanitario” e por un plan de choque contra as listas de agarda, un plan real que contrapuxo aos anuncios baleiros do PP.
“Nos últimos anos o Goberno de Rueda anunciaba que ía haber un plan de choque para reducir as listas de espera e o resultado é que esperamos cada vez máis poder ter a atención á que temos dereito”, denunciou para evidenciar o fracaso da xestión sanitaria do PP.
Tamén en vigoalminuto
- As Festas de San Telmo en Tui, xa teñen cartel
- África substitúe a Rusia como principal provedora de gas fósil a Galicia
- El alcalde reivindica que el Gobierno aporta el 25% de las 207 viviendas protegidas que la Xunta construye en Navia
- El Gobierno anuncia una red de protección inmediata para los afectados por los aranceles
- Intentan recuperar un cuerpo que ha aparecido en el mar, cerca de la Torre de Hércules
- Vuelve la lluvia
Mobilización
Pontón considerou fundamental que a cidadanía tamén exprese cal é a situación que sofre o sistema sanitario galego e, nesta liña, fixo un chamamento á mobilización na manifestación convocada para este próximo domingo, 6 de abril, en Santiago para recuperar a sanidade pública dos “recortes e privatizacións do Executivo do PP”.
A líder nacionalista lembrou que a sanidade pública é “a principal conquista” que temos como sociedade, polo que mostrou o seu convencemento de que a cidadanía sairá o domingo a dicir alto e claro que quere preservar o sistema sanitario público. “Queremos defender o mellor que temos construído nestes anos que é precisamente un sistema sanitario que nos permita que, ante a enfermidade, con independencia de cal sexa a nosa conta bancaria, imos ter a atención que necesitamos”, concluíu.
