África foi a principal provedora de gas natural licuado (GNL) a Galicia durante 2024. Dos 32 buques metaneiros descargados na planta de regasificación de Reganosa en Mugardos, 10 procederon de Alxeria e 7 de Nixeria. Case todo o GNL importado por Galicia en 2024 procedeu do Sur global e dos Estados Unidos (EUA).
O continente africano foi historicamente o principal subministrador de gas natural a Galicia que, coa irrupción deste combustíbel fósil no seu sistema enerxético a partir de finais da década de 1990, reforzou a súa participación no espolio enerxético de África e do Sur global en xeral. En 2024 África recuperou o protagonismo como fornecedor de Galicia que perdera nos últimos anos en favor de Rusia e dos EUA.
Chama a atención o elevado e inusual número de metaneiros con orixe en Alxeria, de onde Galicia pode recibir gas fósil tamén a través da rede ibérica de gasodutos, opción menos mala para o clima, dada a maior pegada de carbono do GNL sobre o gas de gasoduto. No entanto, a regasificadora de Mugardos é a única ou a principal vía de entrada, segundo os anos, do gas fósil en Galicia. Convén lembrar que Sonatrach, a empresa enerxética estatal alxerina de hidrocarburos, é accionista da empresa galega Reganosa (11,74%), controlada polo Grupo Tojeiro e participada tamén pola Xunta.
Os Estados Unidos, segundo provedor
Despois de África, os EUA son a principal orixe dos metaneiros descargados na regasificadora de Mugardos en 2024. 10 metaneiros procederon dos EUA, a cifra máis alta desde que en 2016 Galicia comezou a importar gas fósil desde os EUA, grazas ao desenvolvemento do “fracking”. Esta técnica de extracción, prohibida en España, ademais de degradar o territorio leva asociadas importantes fugas de metano, o que agrava o impacto climático do gas fósil, que mesmo pode igualar ou superar o do carbón. Grazas a Reganosa, Galicia foi pioneira en Europa na importación de gas fósil estadounidense de “fracking”.
En 2024 caeron drasticamente as importacións de GNL desde Rusia. Iniciadas en 2018, acadaron un máximo en 2023, con 20 barcos descargados en Mugardos. Porén, o ano pasado só se descargaron dous barcos.
Malia que cómpre reducir drasticamente as emisións de gases con efecto invernadoiro, o ano pasado bateuse o récord de metaneiros descargados na planta de regasificación de Mugardos, superándose por primeira vez a barreira dos 30 desde a súa entrada en funcionamento en 2007. A pesares diso, a entrada total de gas por Reganosa baixou o 21% con respecto ao ano anterior, no que se atinxiu o pico histórico. Ademais dos países xa citados, tamén subministraron gas fósil ao noso país en 2024 Trindade e Tobago (2 metaneiros) e Qatar.
Tamén en vigoalminuto
- O Tribunal Supremo ratifica a condena á Xunta por vulnerar os dereitos dos médicos de Atención Primaria
- Los perros guía de la ONCE reclaman su derecho de acceso a bares, cafeterías y restaurantes
- ¿Buscas trabajo? estas son algunas ofertas de empleo, publicadas las últimas horas
- Monbus pone en marcha un servicio especial de refuerzos tras el apagón general
- Vigo como cualquier otro día, pero sin clases, sin trenes de media distancia y con la prohibición de bañarse en la playa
- Amnistía Internacional reclama a Xunta y Concello de Vigo más vivienda social
Reexportación
Case todo o gas importado por Galicia destínase ao consumo interno, reexportándose unha pequena parte. O atraso na transición enerxética fixo que o consumo galego de gas fósil aumentase o 41,5% entre 2016 e 2022, experimentando un forte crecemento cando xa debería estar a diminuír rapidamente.
A plataforma ‘Galiza sen gas’ defende o fin do uso de gas fósil na produción eléctrica antes de 2030 e no resto dos sectores antes de 2035. Obxectivos realizábeis mediante a redución do consumo de enerxía e o desenvolvemento das enerxías renovábeis de forma respectuosa co territorio, coa biodiversidade e con protagonismo cidadá.
