Segundo informa hoxe vigolowcost, ábrese prazo de novo para participar nesta iniciativa que consiste en manter unha pequena horta nos terreos da Casa da Xuventude, en López Mora. Esta actividade xa se levou a cabo durante o verán con moi bos resultados.
Entre os obxectivos desta actividade están sensibilizar á mocidade en materia ambiental e de sustentabilidade, dar a coñecer os fundamentos da agricultura ecolóxica, fomentar unha alimentación máis saudable entre a mocidade e dotar dos coñecementos precisos para crear hortas de xeito autónomo.
A participación na horta urbana da Casa da Xuventude non ten custe. Está dirixida a mozas e mozos de Vigo ata os 35 anos de idade, no caso de menores de idade deberán traer unha autorización. A actividade levarase a cabo entre outubro, novembro e decembro.
- Aberto o prazo de inscrición
- Hai 15 prazas e 6 sesións da actividade
- Para apuntarse hai que entregar na Casa da Xuventude unha fotocopia do DNI e un certificado de empadroamento no Concello de Vigo
Máis información
- Casa da Xuventude, López Mora 31
- 986 294 806
- xuventudevigo.org
Se queres coñecer outras propostas pincha aquí.
