O Tribunal Supremo admitiu a trámite o recurso presentado por Galicia Bilingüe contra a sentenza do Tribunal Superior de Xustiza de Galicia (TSXG) que desestima o seu recurso contra co decreto do plurilingüismo.
Segundo informa nun comunicado, Galicia Bilingüe recibiu este mércores a notificación de que o seu recurso contra a sentenza desestimatoria foi admitido a trámite, que se basea en sentenzas do propio tribunal e na doutrina do TC para reclamar «o dereito a recibir o ensino en lingua materna ata os 8 anos».
O TSXG rexeitou os argumentos da entidade presidida por Gloria Lago, ao entender que non existe unha «exclusión do castelán nin se conculca o principio de cooficialidade». Ademais, na súa sentenza argumentaba que a Administración educativa «non pode abdicar» da obriga recollida no artigo 5 do Estatuto de Autonomía «que impón aos poderes públicos normalizar o uso do galego dentro da súa esfera de competencias», engade.
Por outra banda, sobre a consulta aos pais, entende que os motivos que alega a asociación quedan baleiros de «contido» tras o fallo do TSXG anulando a citada consulta por entender que a administración educativa non pode someter a votación «un aspecto tan fundamental como a lingua«, engade.
