Esta semana estanse a levar a cabo as obras para a construción dunha rampla de acceso ao adro da Igrexa de Santa María así como ao cemiterio parroquial dende a estrada EP-2501, en Salceda de Caselas.
A zona, de enorme valor patrimonial, carecía ata o de agora dun acceso axeitado para as persoas con mobilidade reducida, polo que se facía precisa unha obra deste tipo. Unha vez estudadas varias opcións, estableceuse como a máis viable, práctica e funcional a construción dunha rampla dende a zona de aparcamento dos vehículos ata salvar a diferenza de nivel co adro da Igrexa, confluíndo así na entrada do recinto os chanzos existentes e a propia rampla.
O proxecto, con un orzamento de 5.594,01 €, está financiado pola Deputación de Pontevedra, a través da liña de axudas para a rehabilitación do patrimonio histórico-cultural dirixidas aos concellos da provincia. O Concello de Salceda consegue con esta obra dous obxectivos fundamentais: por unha banda segue así a “avanzar na liña de conseguir un municipio totalmente accesible para as persoas con mobilidade reducida, e pola outra prosegue na posta en valor e coidado do riquísimo patrimonio histórico-cultural existente en Salceda”.
A Igrexa de Santa María ten a súa orixe coa Raíña Aragonta, esposa do Rei de Galicia Ordoño II, que fundou aquí o Mosteiro de “Sta.María de Saliceta” no ano 914.
O alcalde, Marcos Besada, subliña que “seguimos a traballar en achegar e poñer en valor o noso riquísimo patrimonio cultural e histórico. A Igrexa e Cemiterio de Santa María é referente como corazón e lugar de encontro da Salceda de onte e de hoxe”
