Un total de 65 médicos de Atención Primaria cambiarán de centro de traballo na área sanitaria de Vigo a partir do próximo luns, segundo publica este venres o Diario Oficial de Galicia (DOG).
A medida enmárcase no concurso de traslados que puxo en marcha o Servizo Galego de Saúde (Sergas) como fórmula de conciliación laboral e familiar do persoal e para consolidar postos de traballo fixos nos distintos centros.
Os cambios afectan tanto a centros de saúde como aos Puntos de Atención Continuada (PAC). Do total de facultativos que cambian de centro de traballo na área sanitaria de Vigo, 57 son profesionais de Medicina Familiar e Comunitaria, 7 son pediatras e 1 é odontóloga.
Todos os facultativos que agora cambian de lugar de traballo solicitárono, ao amparo do concurso de traslados. Nuns casos fixérono por conciliación familiar e noutros por proximidade aos seus lugares habituais de residencia. As prazas que queden vacantes como consecuencia dos traslados cubriranse con persoal facultativo interino.
Na área sanitaria de Vigo prestan servizo na actualidade 433 médicos de Familia, 71 pediatras e 21 profesionais de odontoloxía e serán 70.000 os usuarios adultos e 7.000 os nenos e nenas os que cambiarán de médico ou de pediatra próximamente.
