O alcalde das Neves, Xosé Manuel Rodríguez Méndez, acompañado de Perfecto Rodríguez, xerente do Consorcio Galego de Servizos de Igualdade e Benestar, Pilar González Casas, concelleira de Educación, o xefe da obra, arquitecto e técnicos, visitou a nova Escola de Educación Infantil, xa rematada.
Este novo centro, ao que acudirán 20 nenas e nenos, está situado a carón do CEIP Marquesa do Pazo da Mercé. Dispón de 490 metros cadrados, máis de 161 deles construídos. Os mesmos distribúense en dúas aulas de usos múltiples, almacén, zona de descanso, despacho, zona de hixiene, cociña e baños.
No exterior conta con espazo para xogos, hortas, un xardín e a acceso para as familias. O orzamento total das obras foi duns 300.000€.
Unha prioridade do Goberno das Neves
Esta nova Escola Infantil, é unha das prioridades do Goberno municipal e da resposta a unha demanda moi reiterada.
Acordo Xunta-Concello
A mesma é unha realidade logo do convenio asinado co Consorcio Galego de Servizos de Igualdade e Benestar.
Dito convenio establecía que o Concello das Neves tiña que realizar e pagar o proxecto da escola infantil, como así se fixo; poñer a dispor un solar municipal e achegar o 25% do custo total das obras, 75.000€ en total, con cargo aos orzamentos municipais.
O Consorcio Galego de Servizos de Igualdade e Benestar, achegou o 75% do custo total dos traballos, 225.000€, ademais da compra e colocación do mobiliario e a limpeza e desinfección do nova Escola.
Empeza o traslado
No mes de xullo, unha vez colocado o mobiliario, está previsto realizar o traslado dende o local que ocupaba ata hoxe a Escola Infantil ata o novo.
O espazo que deixa baleiro a antiga escola, pegado ao Centro de Saúde, servirá para a ampliación do mesmo. O mesmo estará destinado a unha nova consulta de Pediatría.
A nova escola necesitará unha ampliación case inmediata
Xosé Manuel Rodríguez transmitiu a Perfecto Rodríguez que solicitará “de inmediato” a ampliación da nova Escola Infantil que, finalmente, non poderá acoller a todas as pequenas e pequenos que solicitaron praza na mesma. O alcalde sinalou ao xerente do Consorcio de Servizos de Igualdade que 17 nenas e nenos non obtiveron praza. A ampliación, tal e como comentaron, consistiría na construción dun novo ‘módulo’ para o cal, como estaba previsto, hai espazo libre.
