Segundo un estudo difundido este venres por Adecco, en Galicia asinaranse máis de 45.500 contratos laborais na campaña de Nadal. Esta cantidade supón un descenso do 7% con respecto ao mesmo período do ano pasado.
Dacordo coas previsións de Adecco, por provincias, en Pontevedra haberá 23.056 contratacións (-7%), en A Coruña 17.418 (-8%), en Lugo 3.047 (-5%) e Ourense 2.047 (-10%).
Os sectores relacionados co grande consumo e o e-Commerce son os que liderarán as contratacións: alimentación, distribución, retail, loxística e transporte.
Encargados de empaquetado, de preparado de pedidos, mozos de almacén, ou repartidores serán algúns dos profesionais máis demandados.
