A Deputación de Pontevedra será a primeira administración de Galicia en poñer a disposición dos concellos e entidades de ámbito social un investimento de 4 millóns de euros para que poidan facer fronte ás consecuencias que a Covid 19 ten para a poboación “e particularmente para a xente máis vulnerable”, como sinalou hoxe a súa presidenta.
Que ninguén quede atrás e sufra a pandemia
Carmela Silva, acompañada pola deputada de Política Social, Olga García, Silva anunciou que o citado investimento para 2021 “é o maior que fixo nunca esta institución provincial en política social” para que municipios e organizacións poidan cubrir as necesidades da poboación dentro do esforzo que están a facer “para que ninguén quede atrás e sufra a pandemia con maior exceso do que o sufrimos o conxunto da sociedade”.
Neste senso, Silva anunciou que a Deputación está a adiantar todos os prazos destas actuacións en política social “porque ante a situación actual entendemos que debemos ser proactivas na loita contra as consecuencias da pandemia, na atención ás persoas dependentes e en promover a igualdade de oportunidades. Estas son as nosas metas. Queremos que os concellos, que son a administración máis próxima a veciñanza, e o tecido asociativo conten con recursos de xeito inmediato e áxil para dar respostas as necesidades sociais”.
2,5 millóns Plan de Cofinanciamento dos Servizos Sociais
Máis polo miúdo, a maior parte do citado orzamento, 2,5 millóns, corresponde ao Plan de Cofinanciamento dos Servizos Sociais Comunitarios Municipais para os 52 concellos de menos de 20.000 habitantes, que hoxe aprobou a Xunta de Goberno da Deputación e que acada un incremento do 5,3%.
1,3 millóns para o Servizo de Axuda no Fogar
O plan asigna 1,3 millóns de euros para sufragar a prestación directa do Servizo de Axuda no Fogar nos domicilios por parte de persoal especializado e 1,2 millóns de euros para cubrir os custos do persoal dos Servizos Sociais Comunitarios. A presidenta indicou que, como novidade, este ano os concellos poderán solicitar o adianto do 50% do importe que lles corresponda do plan, “unha medida de axilidade para que lles cheguen recursos de forma inmediata”.
470.000€ para entidades que traballan no ámbito social
Amais, a Xunta de Goberno aprobou tamén hoxe as bases das subvencións por concorrencia ás entidades que traballan no ámbito social. Son case medio millón de euros (470.000) neste 2021, que serven, como indicou Carmela Silva, “para financiar actuacións dirixidas a colectivos que, polas súas circunstancias persoais, psíquicas, físicas, socioeconómicas ou outras se atopen en situación de desvantaxe e vulnerabilidade social, que ademais teñen aumentado moito nesta situación de pandemia global”.
Neste caso, como novidade, increméntase o importe máximo que pode recibir cada proxecto, que o ano pasado era de 6.000 euros e agora de 7.000, “de xeito que poidan asumir o incremento de atender a máis persoas usuarias”.
Axudas directas para proxectos de interese social
Doutra banda, xa teñen luz verde as axudas directas para proxectos de interese social, que ao aprobarse definitivamente o orzamento o pasado día 8 xa poden ser tramitadas. Desta forma axilízanse 372.000 euros que se repartirán entre 23 organizacións, entre elas Érguete, Cogami, Afapo, Afamp, Alborada, Afasal, Afamo, Xoga, Feafes, Arela ou Amencer-Aspace.
Estas subvencións destínanse a programas que, entre outras actuacións, desenvolverán actividades de atención integral a persoas con diversidade funcional, estimulación da linguaxe, programas de inserción sociolaboral ou atención á infancia máis vulnerable en situación de emerxencia entre outros.
Axudas Básicas de Emerxencia 2021
E o vindeiro luns, día 18 de xaneiro, publicaranse no Boppo as bases para que os 52 concellos de menos de 20.000 habitantes poidan solicitar as Axudas Básicas de Emerxencia 2021, ás que este ano a Deputación destina 565.000 euros, un 17% máis que o ano pasado. “Tamén adiantamos os prazos -explicou a presidenta- para que os Concellos poidan dispor canto antes deste investimento, e ofrecemos a posibilidade de que obteñan por adiantado un 50% do importe fronte ao 35% que estaba contemplado con anterioridade á pandemia”.
Compra de roupa, produtos farmaceúticos, alimentos
Neste caso, os concellos poden destinar estas axudas á atención das persoas en situación de vulnerabilidade para afrontar gastos de alimentación, vivenda, produtos farmacéuticos ou necesidades básicas. Como novidade, inclúese este ano na tipoloxía destas achegas a adquisición de roupa e calzado, así como a compra de produtos de protección contra a Covid, como máscaras ou xel hidroalcólico.
