Concello e Aqualia colocaron hoxe a primeira pedra do proxecto de ampliación e modernización da Estación Potabilizadora de Auga (ETAP) de Vigo, situada en O Casal.
23 millóns de euros
Cun investimento estimado de 23 millóns de euros, a construción acometerase ao longo dos próximos 18 meses. Con esta nova instalación,
Vigo eleva a súa esixencia por encima da nova Directiva europea sobre a auga de consumo humano.
Trátase dun proxecto innovador, xa que o uso de membranas de ultrafiltración para a mellora da calidade da auga na potabilización da auga dunha gran cidade como Vigo supón un “fito tecnolóxico“.
Construción en dúas fases
O proxecto de ampliación e modernización da Potabilizadora realizarase en dúas fases principais.
Na primeira, terá lugar a construción, sobre o decantador existente, dun edificio de dúas alturas e planta circular. A planta inferior, albergará as canles de floculación e remineralización e os depósitos da auga pretratada nesta fase, e o bombeo ata a planta superior, onde se situarán os sistemas de filtración e de ultrafiltración -o corazón da nova ETAP., que, cunha capacidade de filtración de partículas de 0,02 micras, “fornecerá auga dunha calidade excepcional”, sinalan os responsabéis do proxecto.
Unha vez estea operativo, a auga ultrafiltrada conducirase, por gravidade, ao depósito de cabeceira que ten 132.000 m3 (a auga equivalente a máis de 50 piscinas olímpicas) e de aí ao sistema de distribución que pasa por ser “a maior infraestrutura hidráulica de Galicia”.
Unha vez que o sistema de ultrafiltración estea operativo e xa se estea producindo auga a partir del, activarase a segunda fase que contemplará a remodelación da instalación ao completo e a construción dun laboratorio de última xeración, así como unha nova sala de control totalmente automatizada.
Grandes retos do proxecto
Un dos grandes retos aos que se enfronta o proxecto é “continuar co tratamento e distribución de auga” mentres a nova ETAP constrúese na mesma localización. O servizo de auga potable seguirase prestando con total normalidade aos máis de 500.000 cidadáns dos 5 municipios que reciben auga desta planta mentres as obras avanzan.
