Ofrécense 30 euros de desconto aos clientes nas tendas que participen
Os comerciantes galegos poden adherirse a partir de mañá, xoves 13 de outubro, ao programa do Bono Activa Comercio, unha iniciativa á que a Xunta destina 5 millóns de euros, coa previsión de chegar a mobilizar
17 millóns en compras no comercio de proximidade de toda Galicia.
Como facelo?
Tal e como vén de publicar o Diario Oficial de Galicia, os establecementos poderán sumarse a través da web bonosactivacomercio.gal ata o próximo 30 de novembro.
No caso dos clientes, poderán descargar a través do móbil os seus descontos neste mesmo espazo web desde o próximo 24 de outubro, data na que tamén poderán empezar a utilizarse.
O programa, que prevé chegar a máis de 160.000 persoas, ofrece un bono desconto de 30 euros que se poderá empregar na lista de establecementos adheridos a esta iniciativa.
Descontos
A principal novidade deste ano é a ampliación de tramos de desconto e os importes. Así, o desconto será de 5 euros para compras a partir de 20 euros e inferiores a 30 euros; 10 euros para compras desde 30 euros e inferiores a 50; e de 15 euros se superan os 50 euros de compra.
O obxectivo desta iniciativa, sinalan dende a Vicepresidencia primeira da Xunta, é “axudar á economía das familias contribuíndo a aliviar o impacto da inflación na capacidade de gasto dos fogares galegos; así como incentivar as compras no comercio de proximidade, nunhas datas clave para a actividade comercial”.
