A Deputación vén de rematar o acondicionamento anual de 88 campos de fútbol de 41 concellos da provincia. Deles 63 son de herba sintética e os 25 restantes de herba natural. As actuacións están encadradas dentro do programa de mantemento provincial de campos de fútbol, no que a Deputación aporta maquinaria e persoal para levar a cabo o mantemento e cuxo obxectivo é conservar as cubertas nas mellores condicións para a práctica deportiva e, ao mesmo tempo, aumentar a súa vida útil.
Herba artificial
No caso dos terreos artificiais os procesos que se levaron a cabo foron a limpeza e retirada de elementos vexetais e corpos estraños que se acumulan co paso do tempo (papeis, follas, tapóns, etc.), e a descompactación do céspede. No proceso empregouse maquinaria especializada que incrusta unhas púas de goma vibrantes e o cepillado da cuberta artificial e recebado, é dicir, reposición de area ou caucho.
Herba natural
Nos campos de herba natural as actuacións realizadas foron escarificado (realización de pequenos cortes verticais) para aumentar a densidade da herba; picado da superficie para o aireado da terra; recebado (aporte de arena), e sementeira. A maquinaria empregada neste caso foi un tractor e tres apeiros: picador, escarificador e sementador.
En 41 concellos, entre eles Vigo, Cangas ou Nigrán
Neste 2023 actuouse en campos de fútbol dos concellos da Cañiza; A Estrada; A Illa de Arousa; Agolada; Arbo; As Neves; Baiona; Barro; Caldas de Reis; Cambados; Campo Lameiro; Cangas; Covelo, Gondomar, O Grove, Lalín, Meaño, Meis, Moaña, Mondariz, Moraña, Nigrán, Pazos de Borbén, Poio, Ponteareas, Ponte Caldelas, Pontecesures, Pontevedra, Portas, Redondela, Ribadumia, Salceda de Caselas, Salvaterra de Miño, Sanxenxo, Silleda, Tomiño, Tui, Valga, Vigo, Vilaboa e Vilagarcía de Arousa.
