O Concello de Tui continúa coa mellora dos parques infantís e áreas de lecer e arestora está executando unha nova área lúdico recreativa en Chans do Carrasco, en Randufe. O proxecto, que segue os criterios do Plan Ágora, suporá a
transformación desta zona creando un espazo para o gozo de toda a familia con múltiples opcións.
Asi, o investimento previsto ascende a 298.653,69 €, dos que a Deputación Provincial aportará 287.648,75 € con cargo ao Plan Concellos 2022- 2023. A obra foi adxudicada á empresa Construcciones, Obras Y Viales S.A. (COVSA) e ten un prazo de execución de tres meses.
Traballos
Os traballos comezaron coa retirada do mobiliario, luminarias e coa preparación das superficies existentes de formigón. Ademais, o terreo está a ser nivelado e instalarase a canalización de pluviais e do sistema de rego. Completada esta fase procederase a instalar os diferentes elementos lúdicos, bancadas, novas luminarias e un tótem informativo.
Parque infantil de seguridade vial
Construirase un parque infantil de seguridade vial cun circuíto para a aprendizaxe dos máis pequenos. Non faltarán elementos tradicionais nestas áreas coma randeeiras, tobogáns xunto a elementos novidosos de xogos, adaptados a todas as idades e capacidades. Renovaranse as pistas deportivas, haberá biosaudables, espazo para bicicletas e crearase unha zona delimitada de aparcamento. Non faltará as zonas verdes ao longo deste espazo, que se integrará co actual palco e o lavadoiro de As Chans que foi recentemente restaurado.
