Leonor cumpre hoxe 101 anos na compaña do persoal da residencia de maiores de Covelo e das e das residentes. Esta veciña de Sabarís, Baiona, naceu e vivíu sempre no seu barrio natal de Viso de Calvos xunto aos seus irmáns.
Non se lle esquece o seu ano de nacemento, 1923, tampouco o seu barrio nin a súa familia incluso aqueles que emigraron e lle mandan o seu cariño dende Arxentina.
O alcalde, Pablo Castillo, e a concelleira de Formación e Emprego, Lourdes Enes, no nome de toda a Corporación trasladáronlle os seus parabéns acompañados dunha cesta de flores frescas e unha tarta de aniversario.
O ano de Wembley, Pancho Villa, o golpe de Primo de Ribera…e do Celta
Non é para menos posto que o ano que naceu Leonor comezou en luns; en xaneiro foi o primeiro vo do ‘Autogiro La Cierva’, precursor do helicóptero; en febreiro descubriuse o sepultura de Tutankamon; en abril ábrese ao público o mítico estadio de Wembley; o 20 de xullo matan a Pancho Villa; ollo: o 23 de agosto fúndase o Real Clube Celta; o 2 de setembro prodúcese o atraco máis importante da historia de España: o grupo anarquista Los Solidarios faise con de 500.000 pesetas da sucursal do Banco de España en Xixón; o día 13 o xeneral Primo de Ribera da un golpe de Estado -o primeiro do século XX…mais non o último, desgraciadamente-; Hitler condenado a prisión -lamentablemente, saiu dela.
Ademaís de Leonor, ese ano naceron o bioquímico Santiago Grisolía (falecido en 2022); o cineasta Franco Zefirelli; o príncipe Rainiero III de Mónaco; o actor e director Lord Richard Attenborough; Lola Flores; a soprano María Callas ou o escritor Jorge Semprún.
Se queres vivir 100 anos tes que ir a Covelo
Xa o dixemos: os veciños e, especialmente, as veciñas de Covelo teñen tendencia a chegar a centenarias. Temos probas: en novembro de 2023 celebramos os 108 anos de Concepción Val e o pasado marzo os 100 anos de Valentina Muíños… qué terá este concello? Será a comida? O aire? A tranquilidade?…señor alcalde, qué posibilidades hai que que levemos a nosa redacción para Covelo? Xa nos contará.
