A Xunta abre este xoves o prazo para solicitar as axudas para cubrir os gastos de adopción de animais abandonados, que ten como obxectivo facilitar un fogar a un milleiro de cans e gatos.
150€ para as persoas que adopten un can e 125€ se é un gato
O Diario Oficial de Galicia publicou onte a orde pola que se convocan axudas de ata 150€ ás persoas que adopten un animal doméstico de compañía procedente dalgún dos centros de recollida autorizados na comunidade co fin de cubrir os primeiros gastos veterinarios e de identificación que teñen que asumir os cidadáns cando deciden dar este paso.
Así, os importes máximos das axudas quedarán fixados en 150€ no caso de que o animal adoptado sexa un can e en 125€ se se trata dun gato, sendo subvencionables os custos derivados da identificación mediante microchip, desparasitación, vacinación e esterilización nos que teña incorrido o centro de recollida, de ser o caso, para garantir o correcto estado hixiénico-sanitario dos exemplares no momento en que se lle entregue ao seu novo dono, de acordo cos requisitos que establece a Lei de protección e benestar dos animais de compañía en Galicia.
Requisitos
En todo caso, só poderán acollerse a estas novas axudas aqueles cidadáns que acrediten a adopción dun animal doméstico de compañía procedente dalgún dos centros de recollida autorizados e inscritos no Rexistro Galego de Núcleos Zoolóxicos (Reganuz) —39 na actualidade— e sempre que esta se produza desde a entrada en vigor da orde e antes do 30 de setembro de 2024.
Así mesmo, cada solicitante poderá recibir axudas por, como máximo, dous animais de compañía. Ademais, os beneficiarios deberán comprometerse a non transmitir a outra persoa a titularidade do animal que adopten mentres este siga vivo, salvo en casos debidamente xustificados por razóns de enfermidade, incapacidade sobrevida ou vulnerabilidade económica da persoa adoptante orixinal.
