A Deputación de Pontevedra abre este venres, 16 de agosto, o prazo para que os maiores de 55 anos poidan inscribirse en +Benestar, que oferta 2.127 prazas para gozar de estancias en balnearios, talasos ou spas da provincia. Este programa, impulsado pola institución provincial con máis de 220.000 euros, permitirá acceder ao turismo de saúde na súa dobre función de tempo de vacacións e tratamento sanitario.
Seis días e cinco noites
O programa ofrece estadías de seis días e cinco noites nun establecemento termal para estas máis de
2.100 persoas empadroadas na provincia que deben cumprir algún dos seguintes requisitos:
- ter 55 anos ou máis
- no caso de non chegar a esta idade, contar cunha discapacidade superior ao 65%
- ser pensionistas
- ou ter acreditado un respiro familiar
Das 2.127 prazas ofertadas, 2.097 das prazas están subvencionadas con 100 € por parte da Deputación, e outras 30 resérvanse para persoas en risco de exclusión, cunha subvención de 400 € sobre o custo total.
De Mondariz a Sanxenxo, pasando polo Grove
En concreto, o programa desenvolverase en sete establecementos termais da provincia, situados en
Sanxenxo, Mondariz, O Grove e Lalín (Gran Talaso Hotel Sanxenxo, Balenario de Mondariz, Hotel Carlos I Silgar, Talaso Hotel Louxo La Toja, Hotel Spa Norat Torre do Deza, Hotel Spa Galatea e Hotel Nuevo Astur Spa).
Os prezos oscilarán entre os 330 e os 425 euros, segundo o establecemento. Ademais da estadía, o paquete comprende pensión completa (coas bebidas incluídas); o uso do spa, do balneario ou doutras instalacións de características similares un mínimo de dúas horas ao día; e o traslado de ida e volta en autobús aos establecementos desde os concellos de Vigo ou Pontevedra.
Para levar a cabo este programa a Deputación conta cun rexistro de 53 concellos adheridos ao plan, que
facilitarán ás persoas a realización dos trámites e axudas, e que está aberto á incorporación de novos
municipios.
Inscrición
As persoas interesadas teñen un prazo de 15 días desde este venres para presentar as súas solicitudes. Poden facelo de xeito telemático a través da Sede electrónica da Deputación ou de xeito presencial. Todos os detalles e requisitos poden consultarse nas bases do programa +Benestar, publicadas no Boletín Oficial da Provincia de Pontevedra.
