A Festa do Gaiteiro de Soutelo de Montes, en Forcarei, celebra o seu 31 aniversario este sábado con dous invitados de verdadeiro luxo: o politólogo e fillo predilecto de Forcarei Xosé Luis Barreiro Rivas como pregoeiro (13:30 horas) e o presidente do Grupo Puentes y Calzadas, José Manuel Alonso, como ‘Embaixador’.
Será a primeira vez que a festa conte con embaixador, para o que se buscou unha persoa natural da terra, “de pretixio, que llegustase a Festa do Gaiteiro e o municipio e que se sentise orgulloso do que está a facer”. E Alonso cumpre con todos os requisitos: medalla de Galicia en 2008, amante da súa terra e da gastronomía.
Unha festa cun amplo programa que comezou onte e que levará actuacións durante toda a mañá pola vila. Tras o pregón, ás 13:45 horas, actuación de Manuela Cortizo Medal, que cantará as coplas cos gaiteiros de Soutelo. Ao remate, entrega das medallas oficiais do Gaiteiro 2010 á Banda de Gaitas Xuntanza Galega de Alcobendas-Madrid, a Ramiro Cortizo Taboada, ao Grupo Gadis e a José Luis Barreiro Rivas.
Tras a imposición ao Embaixador da Festa e unhas palabras da presidenta do Parlamento galego, Pilar Rojo, a banda de gaitas de Forcarei interpretará o himno galego co voz da cantante Almudena Janeiro. Xa ás 15 horas, haberá que coller sitio para ver o trailer da campaña de Gadis titulada ‘Super Gaiteiro’, para a que buscará en Forcarei ao seu protagonista.
Xa pola tarde, ás 17 horas, actuación de ‘A Magnifique Bande dos Homes Sen Medo’ antes do XII Concurso de Gaiteiros Avelino Cachafeiro e da actuación do Rancho Folclórico de Vila de Prado de Vilaverde (Portugal). E ás 22:30 horas, concerto na Praza do Gaiteiro en homenaxe a José Firvida Cachafeiro, ‘Maduro’.
